அத்தியூர் விஜயா வழக்கு நிதி தர வேண்டுகோள்!

அத்தியூர் விஜயா வழக்கு நிதி தர வேண்டுகோள்!

செஞ்சி வட்டம், அனந்தபுரம் அருகேயுள்ள அத்தியூரைச் சேர்ந்த பழங்குடி இருளர் பெண் விஜயாவை, ஒரு திருட்டு வழக்கில் அவரது பெரியப்பா மகன் வெள்ளையனைத் தேடிச் சென்ற புதுச்சேரி போலீசார் ஆறுபேர் கடந்த 29-7-1993 அன்று கூட்டாக பாலியல் வன்கொடுமை செய்தனர்.

பல்வேறு போராட்டங்கள், சட்ட நடவடிக்கைகளைத் தொடர்ந்து தமிழக அரசு இவ்வழக்கில் சி.பி.சி.ஐ.டி. விசாரணைக்கு உத்தரவிட்டது. வழக்கை விசாரித்த விழுப்புரம் மாவட்ட சி.பி.சி.ஐ.டி. போலீசார் கடந்த 2-7-1997 அன்று குற்றப்பத்திரிகை தாக்கல் செய்தனர். அதில் புதுச்சேரி போலீசார்களான நல்லாம் கிருஷ்ணராய பாபு (உதவி ஆய்வாளர்), வி.ராஜாராம் (தலைமைக் காவலர்), ஜி.பத்மநாபன் (காவலர்), கே.முனுசாமி (காவலர்), ஜி.சுப்புராயன் (காவலர்), கே.சசிகுமார் நாயர் (தலைமைக் காவலர்) ஆகியோர் விஜயாவை பாலியல் வன்கொடுமை செய்ததாக குற்றம் சாட்டப்பட்டது.

சென்னை உயர்நீதிமன்ற உத்தரவின்பேரில் இவ்வழக்கில் எஸ்.சி., எஸ்.டி. வன்கொடுமைத் தடுப்புச் சட்டம் 1989 பிரிவுகள் சேர்க்கப்பட்டன. மேலும், பாதிக்கப்பட்ட விஜயாவின் வேண்டுகோளை ஏற்று விழுப்புரம் முன்னாள் - அரசு குற்றவியல் வழக்கறிஞர் எம். ரகுமான் ஷெரிப் அவர்கள் அரசு சிறப்பு வழக்கறிஞராக நியமிக்கப்பட்டார். வழக்கு விசாரணை விழுப்புரம் மாவட்ட முதன்மை அமர்வு நீதிமன்றத்தில் நடைபெற்றது. இவ்வழக்கு விசாரணையின்போது காவல்துறையினர் எவ்வித ஒத்துழைப்பும் அளிக்கவில்லை.

அரசு சிறப்பு வழக்கறிஞர் எம்.ரகுமான் ஷெரிப், உயர்நீதிமன்ற வழக்கறிஞர் பொ.இரத்தினம், புதுச்சேரி கோ.சுகுமாரன், பேராசிரியர் பா.கல்யாணி ஆகியோரின் ஒத்துழைப்பாலும், பழங்குடி இருளர் பாதுகாப்புச் சங்கத்தின் ஆதரவோடும் 42 சாட்சிகள் விசாரிக்கப்பட்டனர்.

இவ்வழக்கில் கடந்த 11-8-2006 அன்று விழுப்புரம் மாவட்ட முதன்மை அமர்வு நீதிபதி திரு. என். ரத்னராஜ் அவர்கள் தீர்ப்பு வழங்கினார். புதுச்சேரி போலீசார் ஆறுபேருக்கு ஆயுள் தண்டனையும், தலா ரூபாய் 31,000/- அபராதமும் விதித்து தீர்ப்பளித்தார். பாதிக்கப்பட்ட பழங்குடி இருளர் விஜயாவுக்கு 13 ஆண்டுகள் கழித்து நீதிகிடைத்தது அனைவருக்கும் ஆறுதல் அளித்தது.

இந்நிலையில், ஆயுள் தண்டனை விதிக்கப்பட்ட புதுச்சேரி போலீசார் ஆறு பேருக்கும் கடந்த 6-11-2006 மற்றும் 8-11-2006 ஆகிய நாளிட்ட உத்தரவின்பேரில் சென்னை உயர்நீதிமன்ற நீதிபதிகள் ஆர்.பாலசுப்பிரமணியன், ஏ.சி.ஆறுமுகம் ஆகியோர் பிணை வழங்கியுள்ளனர். தண்டனை வழங்கி மூன்று மாதத்திற்குள் பிணை வழங்கப்பட்டது என்பது விஜயாவுக்கு காலங்கடந்து கிடைத்த நீதியைக் கேள்விக் குறியாக்கி உள்ளது.

மேலும், பாலியல் வன்கொடுமை செய்த புதுச்சேரி போலீசார் புதுச்சேரி அரசில் செல்வாக்கு மிக்கவர்கள் என்பதால் வழக்குப் பதிவு செய்யப்பட்டு தண்டனை அளிக்கப்பட்ட நாள் வரை அதாவது 13 ஆண்டுகள் பணியில் இருந்து வந்தனர். மேலும், பலருக்கு பதவி உயர்வும் அளிக்கப்பட்டது. மனித உரிமை ஆர்வலர்களின் போராட்டத்தைத் தொடர்ந்து கடந்த 5-1-2007 அன்றுதான் ஆறு போலீசாரையும் பணி நீக்கம் செய்துள்ளனர்.

இந்நிலையில், வழக்கு விசாரணையை வேகப்படுத்தி சென்னை உயர்நீதிமன்றத்தில் சாதகமான தீர்ப்புப் பெற குற்றவாளிப் போலீசார் முயற்சி செய் வருவதாக அறிகிறோம். வரும் ஏப்ரல் மாதம் 4-ந் தேதி அவர்களின் மேல்முறையீட்டு வழக்கு விசாரணை நடைபெற உள்ளது.

இச்சூழலில், சென்னை உயர்நீதிமன்றம் வழங்கியுள்ள பிணையை ரத்து செய்யக் கோரி உச்சநீதிமன்றத்தில் ஒரு வழக்குத் தொடரலாம் என தீர்மானிக்கப்பட்டுள்ளது.

தமிழகத்தின் பெண் வழக்கறிஞர்கள் சார்பில் ஒரு பொதுநல வழக்கு தொடர வேண்டியதற்கான ஏற்பாடுகளை வழக்கறிஞர் பொ.இரத்தினம் அவர்கள் மேற்கொண்டு வருகிறார். தில்லியில் உள்ள மூத்த வழக்கறிஞர் ஆர்.வெங்கட்ரமணி இவ்வழக்கில் ஆஜராகி வழக்கை நடத்த உள்ளார். இதற்கான நடைமுறை செலவுத் தொகை குறைந்தபட்சம் ரூ.10,000/- தேவைப்படுகிறது. மேலும், 13 ஆண்டு காலமாக விஜயா வழக்கைப் பார்த்ததினால் பேராசிரியர் கல்யாணி அவர்களுக்கு தனிப்பட்ட முறையில் பணம் செலவாகியுள்ளதையும் இங்கு குறிப்பிட விரும்புகிறோம்.

அத்தியூர் விஜயாவிற்கு கிடைத்துள்ள நீதியை நிலைநாட்டவும், தொடர் சட்ட நடவடிக்கைகளுக்கும் தங்களிடம் பொருளுதவி எதிர்நோக்குகிறோம். அருள் கூர்ந்து தாங்கள் தங்களால் முடிந்தளவு நிதி அனுப்பி வைத்து விஜயாவுக்கு நீதி கிடைத்திட உதவ வேண்டுகிறோம்.


பேராசிரியர் பா.கல்யாணி
கோ.சுகுமாரன்

முகவரி: 15, முதல் மாடி,

 9-ஆவது குறுக்கு வடக்கு விரிவு,

ரெயின்போ நகர்,

புதுச்சேரி - 605 011.

பேச: 98940 54640

Read More

தலித் அடிமைகள்... தலையிடாத அரசு!

கொளத்தூர் ஒன்றியத்தில் அதிர்ச்சி சர்வே...

அந்தக் கிணற்றருகில் விளையாடிய சின்னக் குழந்தை. திடீரென்று கிணற்றுக்குள் தவறி விழுந்துவிட்டது. அருகில் இருந்த பெண்களின் அலறல் கேட்டு, பக்கத்துத் தோட்டத்தில் வேலை செய்து கொண்டி ருந்த ஒரு பெரிய பையன், கிணற்றுக்கு ஓடி வந்திருக்கிறான். கிணற்றுக்குள் குதித்துக் குழந்தையைக் காப்பாற்ற அவன் தயாரான போது, அவனைத் தடுத்து நிறுத்திவிட்டனர் அந்தப் பெண்கள். எல்லோர் கண் எதிரிலும் அந்தக் குழந்தை உயிருக்குப் போராடி இறந்துவிட்டது...

இது கதையல்ல; நிஜம்! சேலம் மாவட்டம் கொளத்தூர் ஒன்றியத்துக்குள் வரும் கருங்கல்லூர் என்ற கிராமத்தில்தான் இந்தக் கொடுமை நடந்திருக்கிறது.

ஏன் அந்தக் குழந்தையைக் காப்பாற்ற விடாமல், பையனைத் தடுத்தனர்? ஏனென்றால், அவன் ஒரு தலித்! கீழ்சாதிக்காரன் தொட்டால் தீட்டு என்று அவனைத் தடுத்து விட்டார்களாம்!

மனதை சில்லிட வைக்கும் இந்த சம்பவத்தை நம்மிடம் சொன்னவர், இந்திய கம்னியூனிஸ்ட் கட்சியின் சேலம் மாவட்ட செயற்குழு உறுப்பினரும், மேட்டூர் மற்றும் கொளத்தூர் ஒன்றியச் செயலாளரு மான மேவை.சண்முகராஜா. அவரைச் சந்தித்தோம்.

''தீண்டாமைங்குறதே இல்லைனு எல்லா அரசாங்கமும் சொல்றது எந்த அளவுக்கு உண்மைங்கறத பாக்குறதுக்காக இந்த சர்வேயை எடுத்தோம். ஒரு குழுவுக்கு ஆறு பேருன்னு மொத்தம் இருபத்தஞ்சி குழுக்களா சர்வே டீமை பிரிச்சோம். இந்தக் குழுவுல அரசு ஊழியர்கள், வக்கீல்கள், பட்டதாரி இளைஞர்கள்னு எல்லோரையும் கொண்டு வந்தோம். 35 கேள்விகள் கொண்ட கேள்வித்தாளை ரெடி பண்ணி, கொளத்தூர் ஒன்றியத்துல இருக்கிற 54 தலித் கிராமங்களுக்கு அவங்க போனாங்க. அதுல பத்தாயிரம் பேரை சந்திச்சாங்க.

பெரியதண்டா, நீதிபுரம், ஊர்நத்தம், ஒட்டன்காடு, கோவிந்தபாடி, சி.எஸ்.புரம் ஆகிய ஊர்களில் தலித் மக்களுக்கு சலூன் கடையில முடி வெட்டுறது இல்ல. என்ன காரணம்னு விசாரிச்சா தலித் மக்கள் உட்கார்ந்து முடி வெட்டிக்கிட்டுப் போனா அந்த நாற்காலியில மத்த சாதிக்காரங்க உட்கார மாட்டாங்களாம். அதனால இன்னைக்கு வரைக்குமே அந்தக் கட்டுப்பாடு இருந்துகிட்டேதான் இருக்கு. பா.ம.க. மாநிலத் தலைவரான ஜி.கே.மணியோட சொந்த ஊரான கோவிந்தபாடியிலும் இதே கொடுமைதான்.

இந்த ஒன்றியத்துல மொத்தம் 127 டீக்கடைகள் இருக்கு. அதுல 32 டீக்கடையில இன்னும் இரட்டை டம்ளர் முறை இருக்கு. சத்யா நகர் ஏரியாவுல ஹோட்டல்களில் தலித்கள் இன்னமும் கீழேதான் உட்கார்ந்து சாப்பிட்டுட்டு இருக்காங்க. இந்திரா நகர்ல உள்ள கடைகளில் கொட்டாங்குச்சியிலதான் அவங்களுக்கு டீ கொடுக்கிறாங்க.

ஊர்நத்தம்ங்குற கிராமத்துல வெளியூரைச் சேர்ந்த தலித் ஒருத்தரு தெரியாம அந்த ஊருல இருக்கிற பிள்ளையாருக்குத் தண்ணி ஊத்திட்டு சாமிக் கும்பிட்டிருக்காரு. இந்த விஷயம் தெரிஞ்சி, பஞ்சாயத்தைக் கூட்டி அவருக்கு நூறு ரூவா குத்தம் போட்டிருக்காங்க. ஏரிக்காடுங்குற கிராமத்துல மீனாங்குற பொண்ணு பொது பைப்ல தண்ணிப்பிடிக்க போயிருக்கு. அப்போ பைப்ல வச்சிருந்த குடத்துல தண்ணி ரொம்பி கீழே போயிட்டு இருந்திருக்கு. அந்தக் குடத்தை நகர்த்தி வச்சிட்டு, இந்தப் பொண்ணு தண்ணி பிடிச்சிருக்கு. மேல் சாதிக்காரங்க குடத்தை கீழ் சாதிக்காரப் பொண்ணு எப்படி தொடலாம்னு அந்தக் குடத்தைப் போட்டு உடைச்சி தீ வச்சதோடு இல்லாம, குடத்தைத் தொட்ட மீனாவுக்கு நூறு ரூவா தண்டமும் விதிச்சிருக்காங்க!

இருபது கோயில்கள்ல தலித் மக்களை இப்பவும் உள்ளே விடுறது இல்ல. தலித் பையன்கூட வேற சாதி பொண்ணு லவ் பண்ணி ஓடி போயிடுச்சின்னு அந்தப் பொண்ணைப் பிடிச்சிக் கொண்டுவந்து, பொண்ணோட நாக்குல பிளஸ் குறி போல சூடு போட்டுத் தீட்டுக் கழிச்சிருக்காங்க. இது இன்னைக்கு வரைக்கும் வழக்கத்துல இருந்துகிட்டுதான் இருக்கு. தலித் மக்களைப் பண்ணை அடிமைகளாக வச்சிக்கிட்டு வேலை வாங்கிட்டு இருக்கிற பழக்கம் பல கிராமங்கள்ல இன்னும் இருக்கு. அவுங்களுக்கு வருசத்துக்கே சம்பளமா நாலாயிரம்தான் கொடுக்கிறாங்க. ஒரு நாள் வேலைக்கு லீவு போட்டா சம்பளத்துல நூறு ரூவா புடிச்சிக்குவாங்க. நாங்க இப்படி ஒரு சர்வே எடுக்கிற விஷயம் மாவட்ட நிர்வாகத்துக்குத் தெரிஞ்சி போச்சி. உடனே ஒவ்வொரு கிராமத்துக்கா அதிகாரிகள் போய் எதையும் வெளியே சொல்லக்கூடாதுன்னு மிரட்டிட்டும் வந்திருக்காங்க.

தீண்டாமை இல்லைனு சொல்ற அதிகாரி யாரா இருந்தாலும் என்கூட நேரா வரச் சொல்லுங்க. நானே ஸ்பாட்டுக்குக் கூட் டிட்டுப் போறேன். இந்த சர்வேயோட மொத்த ரிப்போர்ட் டையும் தொகுத்து மாவட்ட ஆட்சியர் கிட்ட கொடுக்கப் போறோம். அவரு நடவடிக்கை எடுக்கலன்னா, அதுக்கு மேலதான் எங்க கச்சேரியே இருக்கு. நாங்க சொல்ற கிராமங்களில் உள்ள தலித் மக்கள் மீது நடக்கும் தீண்டாமைக் கொடுமையை ஒழிக்கிற வரைக்கும் எங்க போராட்டம் தொடர்ந்துகிட்டுதான் இருக்கும்.

கொளத்தூர் ஒன்றியத்துல தொடங்கி இருக்கும் இந்த சர்வேயை, அடுத்த கட்டமா சேலம் மாவட்டம் முழுக்க பண்ண போறோம். எந்த ஊருல நாங்க சர்வே பண்ண போறோம்னு முன்கூட்டியே தெரிஞ்சிட்டா அதிகாரிகளும், மத்த சாதிக்காரங்களும் போய் தலித்களை மிரட்டி வச்சிடுறாங்க. அதனால நாங்க எங்கே சர்வே எடுக்கிறோம், எப்படி எடுக்கிறோம்ங்குறதை ரொம்பவும் ரகசியமா வச்சிக்குவோம்'' என்று அதிர்ச்சி மேல் அதிர்ச்சி கொடுத்து முடித்தார்.

பத்திரிகையாளர்கள் சந்திப்பு நடத்தி இந்தக் கொடுமைகளை வெளியே சொல்லவும் திட்டமிட்டிருக்கிறார்கள், இந்திய கம்னியூனிஸ்ட் கட்சியினர்.

சேலம் மாவட்ட கலெக்டர் மதிவாணனிடம் இது தொடர்பாகப் பேசினோம். நாம் சொன்ன விஷயங் களைக் கேட்டுத் திடுக்கிட்டவர், ''கம்யூனிஸ்ட் கட்சியினர் இன்னும் எனக்கு எந்த விவரமும் சொல்லலை. அப்படி அவுங்க ரிப்போர்ட் கொடுத்ததும் உடனடியா அவுங்க சொல்ற இடங்களுக்கெல்லாம் அதிகாரி களை அனுப்பி, விசாரிக்கச் சொல்றேன். தீண்டாமைக் கொடுமை இருந்தா கண்டிப்பா நடவடிக்கை எடுக்கப்படும். அதுல எந்த சந்தேகமும் வேண்டாம்'' என்றார்.

எத்தனை மகாத்மாக்கள் வந்தாலும் தீண்டாமைக்கு மட்டும் மரணமே இல்லை போலிருக்கிறது!

- கே.ராஜாதிருவேங்கடம்
ஜூ.வி - Issue Date: 08-04-07

--
அய்யா பெரியாரின் புகழ் ஓங்குக!

தொண்டன்,
கருப்பு சதீஷ்.
http://karuppupaiyan.blogspot.com

Read More

நாம் யார் ? தமிழனா இந்தியனா ?

நாம் யார் ? தமிழனா இந்தியனா ?

க.அருணபாரதி

 

''தமிழ்'' என்பது ஒரு மொழி மட்டும் என்று யார் சொன்னது ?

 

இனம் என்பது மானுடவியல்(Anthropology) கூற்றுப்படி

மொழி, இடம், பண்பாடு, கலாச்சாரத்தின் படி இயற்கை வழிப்பட்ட ஒர் மக்கள் கூட்டமே இனமாகும்...

 

(இது ஓர் அறிவியல்.. யாரம் 'இனப்பிரிவினை''இனப்பாகுபாடு''இனபேதம்'' என்று கொதிக்கவேண்டாம்..)

 

தமிழருக்கு

ஒரு பண்பாடு (தமிழ்ப் பண்பாடு),

ஒரு மொழி  (தமிழ்),

ஒரு வாழ்வியல் நெறி  (திருக்குறள்),

ஒரு நிலப்பகுதி  (குறி்ஞ்சி, மருதம் உள்ளிட்ட நிலங்கள்)..

 

இப்படி பல வகைகளில் தனித்து விளங்கும் தமிழ் ஒரு மொழி மட்டுமல்ல அது ஒர் தேசிய இனம்... 

 

குமரிக்கண்டம் முதல் சங்கஇலக்கியங்கள் காலம்வரை அதற்கான ஆதாரங்கள் ஏராளம் இருக்கின்றன..

காண்க::

 

இதில் குமரிக் கண்ட வரலாறு ஆய்வு செய்யப்பட்டிருக்கிறது

http://www.tamilnet.com/art.html?catid=79&artid=13862

 

இதில் ஏனைய மொழி வரலாறு ஆய்வு செய்யப்பட்டிருக்கிறது 

http://acharya.iitm.ac.in/mirrors/vv/literature/tlang.html

 

தொல்காப்பியத்திற்கு உரை எழுதிய இளம்பூரணாரிடமிருந்து ஒரு வரியை பார்ப்போம்..

 

ஒரு கேள்விக்கான பதிலை மழுப்பாமல், தெளிவாக பதிலாக சொல்ல வேண்டும்.. இது ஓர் இலக்கண விதி.. இதனை இளம்பூரணார் எப்படி விளக்குகிறார் பார்ப்போமா ?

 

''நும் நாடு யாதேனில்

தமிழ்நா டென்று ரைக்க''

 

அதாவது இரண்டாயிரம் வருடத்திற்கு முன்பிருந்தே ''தமிழ்நாடு'' என்கிற நாடு இருந்ததற்கான ஆதாரணமாக இதனைக் கொள்ளலாம்....

 

அது மட்டுமல்லாமல் சேர, சோழ, பாண்டிய மன்னர்கள் காலத்திலிருந்தே தமிழினம் ஒர் உலக வல்லரசாக வாழ்ந்து ஆண்டுகொண்டிருந்தது...

ஆனால் தமிழ் மன்னர்கள் எந்த வொரு நாட்டையும் அடிமைப்படுத்தி ஆளவில்லை.. அந்தந்த நாடுகளின் மீது படையெடுத்து வென்றதும் அங்கு ஒரு கல்வெட்டோ அல்லது தமிழர் கொடியையோ நடுவார்கள்.. பின் அந்த நாட்டை சார்ந்த ஒருவனை அரசனாக போட்டுவிட்டு சென்றுவிடுவார்கள்.. இப்படி தான் நடந்தது.

 

(அமெரிக்கா மற்ற நாடுகளில் அரசு அமைப்பது போல.. ஆனால் அமெரிக்கா போல தமிழக மன்னர்கள் மற்ற நாடுகளை கொள்ளையடிக்கவும் இல்லை அடிமை முறையில் நடத்தவும் இல்லை.. )

 

கனகவிசயன் என்ற தெலுங்கு மன்னர் ஒரு முறை கண்ணகியை தவறாக பேசிவிட்டார்.. அதனால் ஆத்திரம் கொண்ட சேர மன்னன் நெடுஞ்சேரலாதன், அவன் மீது படையெடுத்து இமயமலையிலிருந்து தமிழகம் வரை அவன் தலையில் கல்லெடுத்து வர வைத்து அந்தக் கல்லைக் கொண்டு கண்ணகிக்கு கோயில் எழுப்பியது வரலாறு... அந்த கோயில் இன்றும் சேரநாடான கேரளத்தில் இருக்கிறது...

 

இப்படி தமிழகம் ஒரு தனி நாடாகவும், தனித் தேசிய இனமாகவும் விளங்கியதற்கு நம்மிடம் பல வரலாற்று சிறப்புமிக்க ஆதாரங்கள் உள்ளன..

 

பின்னால் வந்த முகமதியர் படையெடுப்பாலும், பிற இனத்தவர் படையெடுப்பாலும் இங்கிருந்த தமிழகத்தின் நிலப்பகுதியும் ஆட்சிப்பகுதியும் சுருண்டன.. பின்னர் இந்நிலத்தை ஆண்டவர்கள் டில்லி ராஜ்யத்துடன் மக்களின் அனுமதி பெறாமலேயே இணைத்தனர்... அப்பொழுது கூட இந்தியா என்கிற நாடு உலகில் இல்லை...

 

சிந்து நதிக்கரையோரம், இந்தி மொழி பேசும் மக்கள், இந்து பண்பாட்டை பின்பற்றுவதால் இவை அனைத்தும் கலந்து ''இந்தியா'' என்கிற பெயர் ஏற்படுத்தப்பட்டது... அதனை நாங்கள் 'இந்தி'-'இந்து'-'இந்தியா' என்று சொல்லுவோம்..

 

வெள்ளையர் வந்த போது அவனை விரட்ட இந்த பரத கண்டம் எனப்பட்ட ''இந்தியத் துணைக் கண்டம்'''-{இப்பொழுதிருக்கும், இந்தியா, பாகிஸ்தான்,வங்காளதேசம் இவையணைத்தும் இந்தியத் துணைக் கண்டம்} ஒற்றுமையுடன் செயல்பட வேண்டும் என தலைவர்கள் விரும்பினர்..

 

அதற்காக ''பாரத தேசம், பாரத நாடு, இந்தியா'' என்கிற செயற்கையான நாடும் பெயரும் தோற்றுவிக்கப்பட்டது.. இந்தியத் துணைக்கண்டம் விடுதலையடைய எல்லோரும் பாடுபட வேண்டும் என இணைக்கப்பட்ட பல நாடுகளின் கூட்டமைப்பு தான் இந்தியா..

 

அதாவது இந்தியா என்கிற வார்த்தையை 1700 பிற்பட்ட இலக்கியங்களிலும் ஆவணங்களிலும் மட்டுமே காண முடியும் என்பது அனைவராலும் ஏற்றுக் கொள்ளப்பட்ட உண்மை..

 

இவ்வாறு தான் இந்தியா என்கிற செயற்கையான நாடு உருவானது... இந்தியாவின் அரசியலமைப்பு சட்டத்தில் எங்காவது இந்தியா ஒரு தேசம் என்று கூறிப்பிடப்பட்டுள்ளதா என்றால் இல்லை .....

 

அனைவரும் காண்க :: இந்திய அரசியலமைப்பு சட்டம்::http://lawmin.nic.in/legislative/Art1-242%20(1-88).doc

 

இதில் எங்காவது India is a Nation, Indian is our Nationality என்று பொருள் படும் படி குறிப்பிடப்பட்டிருக்கிறதா என்று பார்க்கவும்..

 

(குறிப்பு:: கண்ட்ரோல் + எஃப் (Ctrl+F)  அழுத்தி தேடவும்  )

 

எங்கும் கிடைக்காது.. ஏனெனில் இந்தியா ஒர் துணைக்கண்டம் என்பதையும், இந்தியா ஒர் ஒன்றியம்(யூனியன்-Union) என்பதையும் அரசியலமைப்பு சட்டம் கூறுகிறது..

 

அரசியலமைப்பு பிரிவு 1-ல் இவ்வரிகளை காணலாம்..

(1) India , that is Bharat, shall be a Union of States.

 

அமெரிக்க ஐக்கிய நாடுகள் (United States of America)  -- State என்னும் வரையறைக்கு நாடுகளின் மதிப்பீடு அளிக்கப்பட்டுள்ளது அங்கு.. அங்கு நிலவுவது பிடரல்(Federal) எனப்படும் கூட்டாட்சி அமைப்பு..

 

அதே போன்ற அமைப்பு தான் இங்கும் இந்தியாவிலும் நிறுவப்பட்டீருக்க வேண்டும்.. ஆனால் இந்தியா Quasi-fedral எனப்படும் பாதி கூட்டாட்சி அமைப்பின் படி உள்ளது.. இதன் படி மத்திய அரசே மாநிலங்களின் மேல் அதிகாரம் செலுத்தும்..

 

தமிழர்கள் தனி நாடாக, தனித் தேசிய இனமாக இருந்து பின்னர் இந்திய ஒன்றியத்தில் இணைந்தனர்.. அதற்கு காரணம் இந்திய விடுதலையின் போது ஏற்பட்ட ஒற்றுமையுணர்வும், வடஇந்தியத் தலைவர்கள் மீது நமது தமிழகத் தலைவர்கள் கொண்ட பாசமும் தான் காரணம்..

 

அவ்வாறு இந்திய ஒன்றியத்தில் இருப்பது ஒன்றும் தவறல்ல.. ஆனால், இந்திய ஒன்றியத்தில் நாம் இணைந்து விட்டதால் நமது தேசிய இன, மொழி மற்றும் நில வரையரை அடையாளங்களையும் உரிமைகளையும் பறிப்பதற்கு அவர்கள் திட்டமிடும் போது நாம் என்ன செய்வது ??????

 

2000 வருடங்களாக அரியணையிலிருந்த தமிழை அகற்றிவிட்டு, இந்தி ஆங்கில மொழிகள் இங்கு வளர யார் காரணம் ??

 

96 சதவீதம் தமிழர்களே வாழ்ந்த தமிழ்நிலங்களான தேவிகுளம், பீர்மேடு உள்ளிட்ட பகுதிகளை தமிழர்களை கேட்காமலேயே கேரளாவிற்கு அளிக்க யார் தைரியம் கொடுத்தது ????

 

நமது தமிழகத்திலிருந்து மின்சாரம், உப்பு உள்ளிட்ட அத்தியாவசிய பொருட்களை பெற்றுக் கொண்டு நமக்கு நீர் கூட தர மறுக்கும் கர்நாடகத்திற்கு யார் தைரியம் அளித்தது ?

 

நெய்வேலியிலிருந்து மின்சாரம் யாரைக் கேட்டு தமிழகத்திற்கே விலை கொடுத்து விற்கிறது மத்திய அரசு ??

 

நமது மாநில எல்லைகளை நம்மைக் கேட்காமலேயே மத்திய அரசு மாற்றலாம் என்கிற அதிகாரம் அவர்களுக்கு எப்படி உள்ளது ??

காண்க:: அரசியலமைப்பு சட்டப்பிரிவு 3

 

ராஜஸ்தான், குஜராத் உள்ளிட்ட 4 மாநிலங்களில் அவரவர் தாய்மொழி உயர்நீதிமன்றத்திலிருக்கும் போது தமிழை மட்டும் சென்னை உயர்நீதிமன்றத்தில் கொண்டுவர மத்திய அரசு மறுப்பது ஏன் ?

 

இவ்வாறு பல கேள்விகளுக்கு விடை தெரியவில்லை.. இதற்கெல்லாம் பதில் அறிய விரும்பாமல் ''போனால் போகட்டும் போடா'' என்று இந்தியன் என்கிற போலி அடையாளத்தில் நான் தமிழக உரிமைகள் பறிபோவதை விரும்பவில்லை..

 

ஏனெனில் இந்தியன் என்பது காலத் தேவைக்கேற்ப உருவாக்கப்ட்ட  அரசியல் உருவக பெயர் தான்..

 

இந்தியாவிற்கு பொது மொழி இல்லை.. பொது பண்பாடு இல்லை.. பொது நிலவரையறை கூட இல்லை..அப்படியிருக்க இந்தியன் என்பது இனம் அல்ல.. அதனால் நமது தேசிய இனம் தமிழே...

இந்தியன் என்கிற இனம் இதுவரை இருந்ததில்லை..

 

நாம் பிறப்பாலும் மொழியலும் இனத்தாலும் தமிழரே...

நாம் இந்தியர் அல்ல..

இந்தியக் குடியுரிமை பெற்ற மக்கள் தாம்..

 

Our Nationlity    : Tamil

Our Citizenship :  Citizen of India

 

இந்த அரசியல் கருத்துக்களை மறைத்து அதன் மூலம் லாபம் சம்பாதிக்க முயலும் வடஇந்திய பெரு முதலாளிகளும், அவர்களின் அரசியல் தரகர்களான 'இந்தி'ய தேசிய கட்சிகளும், அவர்களுக்கு ஊடகங்களான ஊடகங்களும் தான் இந்தியா ஒரு பழம்பெரும் தேசமாகவும், இந்துக்களின் தேசமாகவும் சித்தரித்து ஆதாயம் தேட முற்படுகின்றன..

அவர்களது போலி பிரச்சாரத்திற்கும் உண்மைக்கு புறம்பான பல தகவல்களையும் கொண்டு பரப்பபட்டு வரும் கோட்பாடுகள் தாம் இன்று வெகு மக்கள் கோட்பாடாகிவிட்டது.. அதனை மாற்றியமைக்க நாம் ஒற்றுமையுடன் நமது உரிமைக்காக போராட வேண்டும்..

 

ஞாபகம் இருக்கட்டும்.. நாம் கேட்பது யாசகம் அல்ல, ஆண்டாண்டு காலமாக நமக்கு இருக்கும் உரிமைகளை தான்...

--
-----------------------------------------------------------
"எங்கள் வாழ்வும் எங்கள் வளமும்
மங்காத தமிழென்று சங்கே முழங்கு"
-----------------------------------------------------------
தோழமையுடன்
       க.அருணபாரதி
   www.arunabharathi.blogspot.com
-----------------------------------------------------------

Read More